53. Poem - कुंडली! कुंडली!! कुंडली!!!

कुंडली! कुंडली!! कुंडली!!!

कवयित्री : सौ.वंदना विजय धर्माधिकारी

संगणकाने कमाल केली, जन्मवेळ देता जादू झाली I

गणिती आकडेमोड झाली, समोर जन्मकुंडली आली II 

शनी, राहू, केतू आले, बुध, नेपच्यून, प्लुटो बसले I

गुरु, मंगळ, हर्शल, चंद्र, शुक्रासह असते ‘कुंडली’ II

अक्षांश आणि रेखांश, जगात कोठे मिळतात I

त्यास काय म्हणतात? नाव सांगे ‘कुंडली’ II

पत्रिकेच्या नाना तऱ्हा, नारायणी पाश्च्यात I 

सायन आणि निरयन, सर्वच दावी ‘कुंडली’ II

नक्षत्र, रास, गण, गोत्र, पत्रिकेत एकत्र नोंदली I

दोघांची युती, पाठीशी शशी, सांगड घाली ‘कुंडली’ II

प्रत्येक राशीला साडेसाती, पाच सरली अडीच उरली I

शुभांक आणि खडे दाविती, प्रचीती दावे ‘कुंडली’ II

एक पानी, शंभर पानी, भूत भविष्याची रेखाटणी I

क्षणात सुबक मांडणी, छापून देई ‘कुंडली’ II

अभ्यास करून परीक्षा दिली, मार्कलिस्ट बघता भोवळ आली I

अपयशाने भरली झोळी, ‘काय करू?’ सांगे ‘कुंडली’ II

दोघांची मने जुळली, परी पत्रिका आड आली I

जीवाची घालमेल झाली, तेंव्हा मार्ग दावी ‘कुंडली’ II

नोकरीवरती गदा आली, धंद्याची पुरी वाट लागली I

घरादाराला कळा काळी, उपाय सुचवी ‘कुंडली’ II

ही व्यवसायाची हमी, पैशाला ना पडे कमी I

घ्या संगणकी बसवूनी, श्रीमंत बनवी ‘कुंडली’ II

कुंडली नियमीत  काम, कष्ट थोडे, योग्य दाम I

वेळेचे नियोजन छान, ‘कुंडली’! ‘कुंडली’!! ‘कुंडली’ !!! 

वंदना धर्माधिकारी

१३ जून,२००४